Spænskir fjölmiðlar voru harðorðir í garð Barcelona eftir að liðið átti martraðarkvöld í Meistaradeildinni á Stamford Bridge á þriðjudagskvöld.

Chelsea fór strax í hápressu og náði að skora á fjórðu mínútu, þó markið hafi verið dæmt af. Á 27. mínútu kom þó skelfilegt sjálfsmark frá Jules Koundé og eftir að Ronaldo Araújo fékk sitt annað gula spjald fyrir klaufalega tæklingu á Marc Cucurella, virtist Barca algjörlega ráðalaust gegn leikmönnum Enzo Maresca.

Mundo Deportivo sagði Barcelona hafa verið óþekkjanlegt og talaði um þungt rothögg, auk þess að fullyrða að Chelsea hefði getað skorað fleiri mörk.

AS Sport lýsti leiknum sem martröð, þar sem Chelsea yfirtók Barcelona áður en Katalóníuliðið skapaði sitt eigið „kaos“. Báðir miðlar bentu á að liðið væri fast í 15. sæti Meistaradeildarinnar.

Katalóníska L’Esportiu kallaði frammistöðuna „andvana“, þar sem Barca „gerði Chelsea lífið auðvelt og gerði sér erfitt fyrir að ná í efstu átta sætin“.

Sport var ekki mildara og hrópaði á forsíðu: „Ekki svona, Barca,“ og taldi verkefni Hansi Flicks komið undir mikla pressu.

Lamine Yamal fékk einungis fjóra í einkunn og var sagður einangraður og ósýnilegur megnið af leiknum.