Pep Guardiola, stjóri Manchester City, er hissa á stöðu Claudio Echeverri hjá Bayer Leverkusen.

Echeverri gekk í raðir Leverkusen á láni frá City í sumar, með það fyrir augum að fá dýrmætan spiltíma á háu stigi.

Það hefur þó ekki gengið eftir, er Argentínumaðurinn í aukahlutverki og sagan segir að allir aðilar skoði að rifta lánssamningnum í janúar.

„Þetta er spurning fyrir hans fallega umboðsmann,“ segir Guardiola um framtíð Echeverri.

„Við bindum miklar vonir við hann og maður spyr sig hvað gerðist í Leverkusen, ég veit það ekki. Umboðsmaður hans veit meira en aðrir.“

Kappinn gekk í raðir City frá River Plate fyrir tæpum tveimur árum síðan og hefur alls spilað þrjá leiki fyrir aðalliðið.