Mikel Arteta, knattspyrnustjóri Arsenal, segir að Bukayo Saka vilji halda áfram hjá félaginu á sama tíma og samningaviðræður við enska landsliðsmanninn halda áfram að þróast í rétta átt.

Sky Sports greindi frá því í vikunni að viðræður héldu áfram og væru jákvæðar, þó enn væri ekki búið að ná samkomulagi. Báðir aðilar séu þó einarðir í því að finna lausn.

Arteta staðfesti bjartsýnina á fréttamannafundi. „Ég veit að hann vill vera áfram hjá okkur. Hann er mjög ánægður og vill halda áfram á þeim stað sem hann vill vera og ná öllu því sem við stefnum að saman.“

Arteta bætti við að hann myndi ekki blanda sér í smáatriði viðræðnanna: „Hvenær og hvernig þetta gerist? Það læt ég Andrea Berta sjá um.“

Saka er einn mikilvægasti leikmaður Arsenal og hefur verið fastamaður í liðinu frá ungum aldri.