Því hefur verið velt upp undanfarið hvort Lionel Messi gæti gengið í raðir Barcelona á ný. Spænskir miðlar segja félagið hafa skoðað hvað það myndi þýða fjárhagslega.

Messi yfirgaf Börsunga sumarið 2021 á frjálsri sölu. Fjárhagskraggar félagsins gerðu það að verkum að ekki voru til peningar til að endursemja við argentíska snillinginn, sem hafði verið hjá því allan sinn feril.

Messi, sem er orðinn 38 ára gamall, fór þá til Paris Saint-Germain, þar sem hann eyddi tveimur árum. Nú er hann á mála hjá Inter Miami í Bandaríkjunum og hefur gert mikið fyrir fótboltann vestan hafs.

Forseti Barcelona, Joan Laporta, útilokaði vissulega á dögunum að Messi gæti komið aftur en því er haldið fram að menn hafi lagst yfir hversu miklar tekjur það gæti fært félaginu að fá Messi aftur, þar sem hann er auðvitað gríðarlega vinsæll.

Talið var að tekjur sem fylgja Messi og hans persónu yrðu um 200 milljónir evra ef hann myndi verja einu ári til viðbótar á ferlinum. Lánsdvöl til skamms tíma frá Inter Miami gæti þá fært félaginu allt að 100 milljónir evra.

Það er því spurning hvort forsetinn muni endurskoða afstöðu sína. Messi hefur ekki farið leynt með að hann hefði viljað kveðja Barcelona öðruvísi.