Arnar Gunnlaugsson þjálfari íslenska landsliðsins þurfti að gera tvær breytingar á leikmannahópi sínum um helgina. Orri Steinn Óskarsson og Aron Einar Gunnarsson meiddust.
Aron meiddist á undan Orra en Brynjólfur Willumsson var kallaður inn í hans stað, Aron hefur verið varnarmaður undanfarið en Brynjólfur er framherji og hefur verið frábær í Hollandi undanfarnar vikur. Nokkur gagnrýni var á það að Brynjólfur væri ekki í upphaflega hópnum.
Skömmu síðar meiddist Orri sem er framherji liðsins og Hjörtur Hermansson sem er varnarmaður var kallaður inn í hans stað.
„Þetta gerist alltaf, stærra skarð að missa Orra því Aron var í banni í fyrsta leiknum. Skellur að fyrirliðinn sé frá, hann byrjar að kalla inn striker fyrir varnarmann. Svo dettur framherji út og þá er kallaður inn varnarmaður. Stórfurðulegt,“ sagði Kristján Óli í Þungavigtinni í gær
Mikael Nikulásson var sammála Kristjáni en Ísland mætir Aserbaísjan og Frakklandi í fyrstu tveimur leikjunum í undankeppni HM 2026.
„Ég ætla að vera sammála Stjána þar, það verður að segjast eins og er. Landsliðshópurinn er valinn og þetta hefur gerst fyrir alla landsliðsþjálfara, Arnar er að velja 90 prósent af sínum bestu leikmönnum,“ sagði Mikael og hélt svo áfram.
„Hann var gagnrýndur fyrir að velja ekki Brynjólf og hann skorar tvö mörk rétt á eftir, hann er markahæstur í hollensku úrvalsdeildinni. Ég velti því fyrir mér hvort Aron hafi fengið símtalið um að draga sig bara út eftir þessi mörk Brynjólfs, þetta er mjög furðulegt.“
