Grunur leikur á um að forráðamenn ÍH í 3. deild karla hafi ætlað sér að falsa leikskýrslu liðsins fyrir leik gegn Magna í gærkvöldi. Magni vann þar frábæran 15-0 sigur en KSÍ skoðar málið

Leikurinn fór af stað um hálftíma síðar en áætlað var. Málið hófst á því að dómari leiksins mat það að búningar ÍH væru of líkir búningum Magna og þeim gert að skipta um treyjur.

ÍH var ekki með varabúninga og því þurfti að fá lánaða búninga hjá Magna, þegar það gerðist þurfti dómarinn að fá breytt númer leikmanna.

Samkvæmt heimildum 433.is komst hann þá að því að leikmenn sem skráðir voru í byrjunarliði ÍH voru ekki á staðnum. Orsakar það meðal annars tvær breytingar á liði ÍH á fyrstu mínútu samkvæmt skýrslunni.

„Við erum að byrja mjög seint, ÍH gerðu einhvern feil. Þeir eru í Magna treyjum, ekki vera hissa ef númerin klikka eitthvað. Þeir fóru út rétt áðan en voru sendir aftur inn,“ sagði í útsendingu Magna TV en þá var klukkan 18:10 og leikurinn átti að vera farin af stað.

„Leikskýrslan hjá ÍH, við vitum ekki alveg allt,“ sagði nokkru síðar en þá var klukkan 18:21 og leikurinn átti að fara af stað 18:00.

Leikmenn ÍH voru svo níu á vellinum. Ragnar Halldór Bogason og Mikael Kristinn Rúnarsson voru ekki á svæðinu í gær og ekki viðloðnir umræddan leik, en þeim var þó skipt af velli á 1. mínútu ef mark er tekið á skýrslunni. Þá gat ÍH fullmannað lið sitt en liðið fékk að gera breytingarnar áður en leikurinn hófst.

KSÍ hafði fengið veður af málinu þegar 433.is leitaðist eftir upplýsingum þar. „Málið er bara í vinnslu hér innanhúss,“ sagði Þóroddur Hjaltalín yfirmaður dómaramála hjá KSÍ og sagði að beðið væri eftir skýrslu dómarans meðal annars.

Magni er á toppi 3. deildarinnar en ÍH situr á botninum með fjögur stig og hefur fengið á sig 95 mörk í 18 leikjum.