Hjörvar Hafliðason var staddur á Old Trafford fyrir hönd SÝN Sport í gær er Manchester United tók á móti Arsenal í fyrstu umferð ensku úrvalsdeildarinnar.

Arsenal vann leikinn 0-1 þrátt fyrir fína frammistöðu heimamanna. Hjörvar tók viðtal við fyrirliða United, Bruno Fernandes, að leik loknum. Spurði hann til að mynda út í mistök Altay Bayindir í marki United í eina marki leiksins, en þar virkaði Tyrkinn ekki sannfærandi.

„Þegar maður fær á sig mark þá eru það ekki einstaklingsmistök heldur eru það mistök okkar allra. Það eiga allir þátt í þessu. Það taka allir sína ábyrgð á markinu og ekki meira um það að segja,“ sagði Fernandes hins vegar.

Hjörvar spurði Fernandes einnig hvort 3-4-3 leikkerfi Amorim geti einfaldlega gengið í enska boltanum. „Chelsea vann deildina með þessum hætti undir stjórn Conte, svo ég held að þetta virki,“ sagði Fernandes þá.

Að viðtalinu loknu var skipt yfir í myndver hér heima, þar sem Arnar Gunnlaugsson og Ólafur Kristjánsson voru hjá Kjartani Atla Kjartanssyni.

„Ég var ánægður með spurningarnar frá Hjörvari, hann var tilbúinn með boxhanskana,“ sagði landsliðsþjálafarinn Arnar og hló.

„Það rann alveg rautt United-blóð í æðum spyrilsins,“ skaut Ólafur inn í, en Hjörvar er harður stuðningsmaður United. „Fáum við ekki fleiri spurningar?“ sagði Arnar að endingu.