Gary Neville, Manchester United-goðsögn og sparkspekingur, segir algjörlega nauðsynlegt að félagið sæki markvörð áður en félagaskiptaglugginn lokar.

United tapaði fyrsta leik sínum í ensku úrvalsdeildinni gegn Arsenal í gær. Eina mark leiksins kom eftir fast leikatriði þar sem Altay Bayindir, virkaði lítill og aumur. Tyrkinn byrjaði í stað Andre Onana, sem hefur fengið mikla gagnrýni í treyju United.

„Manchester United verður að finna sér nýjan markvörð. Það er svakalega óþægilegt að hafa ekki augljósan aðalmarkvörð með góða áru, einhvern sem eignar sér teiginn, kýlir allt í burtu og á vörslur sem tryggja þér stig,“ sagði Neville eftir leikinn í gær.

Stór nöfn eins og Gianluigi Donnarumma hjá Paris Saint-Germain og Emi Martinez hjá Aston Villa hafa verið orðuð við Old Trafford undanfarið, sem og fleiri.

„Það hefur verið talað um Donnarumma og Martinez. Þeir væru frábærir kostir fyrir United og ekki endilega því þeir eru bestu markverðir í heimi, heldur vegna þess hvernig karakterar þeir eru. Við höfum séð frammistöðu Donnarumma í úrslitaleik EM með ítalska landsliðinu, í stórum leikjum með PSG. Martinez hefur unnið HM,“ sagði Neville.

„Það þarf að leysa þetta markvarðarmál því annars halda þeir áfram að fá á sig mörk og það dregur úr því sem liðið er að reyna að gera.“