Atvikið átti sér stað síðasta miðvikudagskvöld þegar mennirnir, báðir í sinni fyrstu ferð til landsins, voru á skemmtistað í hverfinu Lapa. Þar hittu þeir þrjár huggulegar konur og endaði það þannig að konurnar buðu þeim í glas. Það sem þeir vissu ekki var að búið var að blanda svefnlyfjum í drykkina.
Annar mannanna, 21 árs verkfræðinemi, segir við brasilíska fjölmiðla að hann hefði aðeins tekið tvo sopa áður en hann missti meðvitund. Þegar hann vaknaði á sjúkrahúsi var búið að hirða um 16.000 pund, eða 2,6 milljónir króna, af kortinu hans.
Á myndbandsupptöku sem birt hefur verið í bresku pressunni má sjá hann skjögra með fram Ipanema-ströndinni áður en hann dettur í sandinn meðvitundarlaus. Vinur hans varð einnig fyrir barðinu á konunum og tapaði einnig umtalsverðu fé.
Í frétt The Sun kemur fram að lögreglan í Rio hafir handtekið þrjár konur vegna málsins: Amanda Couto Deloca (23 ára), Mayara Ketelyn Americo da Silva (26 ára) og Raiane Campos de Oliveira (27 ára). Sú síðastnefnda hefur áður setið af sér sex mánaða fangelsisdóm fyrir sams konar brot og alls verið handtekin 20 sinnum áður.
Konurnar eru sagðar vera starfa sem vændiskonur og munu þær einkum beina spjótum sínum að erlendum ferðamönnum.
Fram kemur í fréttum brasilískra fjölmiðla, sem Sun vísar til, að ungur maður hafi komið mönnunum til bjargar með því að hringja á sjúkrabíl og hjálpa lögreglu að finna gerendurna. Myndband sem hann tók sýnir konurnar flýja vettvang í leigubíl.
Lögreglan rannsakar nú málið og bíður niðurstöðu eiturefnaprófa til að staðfesta hvaða lyf voru notuð. Lögregla hefur hvatt erlenda ferðamenn í borginni til að vera á varðbergi og neyta einungis drykkja sem blandaðir eru fyrir framan þá.
Svindl af þessu tagi gengur undir nafninu „Goodnight Cinderella” sem er vísun í ævintýrið um Öskubusku. Felur svindlið í sér að blanda deyfandi eða svæfandi efnum í drykk einhvers án vitundar viðkomandi. Er markmiðið jafnan að ræna viðkomandi eða beita kynferðisofbeldi.
Verkfræðineminn ungi segir að hann muni hugsanlega heimsækja Brasilíu aftur einn daginn. „En í bili er ég kominn með nóg af þessu landi.“
