Vopnuð tveimur eldhúshnífum og þremur rakvélablöðum var 16 ára sænsk stúlka aðeins nokkrum sekúndum frá því að hrinda áætlun sinni um að myrða ung skólabörn í framkvæmd.

Með hníf í hvorri hönd stóð hún fyrir framan fimmtán 7 ára börn og tvo kennara. Kennurunum tókst sem betur fer að stöðva hana.

Expressen skýrir frá þessu og segir að þetta hafi átt sér stað í lok maí í Fagerslättsskolan í bænum Nybro.

Það var um klukkan 9.30 sem stúlkan gekk inn í skólann með hnífa í höndunum. Hún hafði áður verið nemandi í skólanum.

Rétt eftir að hún kom inn í skólann rakst hún á fyrrnefndan hóp barna á ganginum. Þau voru á leið í frímínútur.

„Börnin sögðu henni að hún hræddi þau og kennarinn bað hana um leggja hnífana frá sér af því að börnin væru hrædd. Þá svaraði stúlkan: „Það er það sem þetta snýst allt saman um,““ sagði Nina Erlandsson, saksóknari, í samtali við Barometern.

Annar kennarinn, kona, kastaði sér á stúlkuna og tókst að slá hana í gólfið.

Erlandsson sagði að þetta hefði verið lífsbjargandi því á meðan hefði hinum kennaranum tekist að koma börnunum inn í skólastofu.

Kennarinn náði að halda stúlkunni niðri þar til lögreglan kom á vettvang og handtók hana.

Fyrir dómi kom fram að þegar hún var handtekin hafi hún sagt lögreglunni að hún hafi ætlað að myrða börnin af því að hún var reið og döpur þegar hún stundaði nám í skólanum. Lögreglan fann einnig skrifaðan texta frá henni sem studdi þetta.