Aldrei hafa fleiri verið óánægðir með stjórnarandstöðuna á Alþingi. Þetta kemur fram í nýrri könnun Maskínu þar sem 41,7 prósent sögðust mjög óánægð með störf stjórnarandstöðunnar og 18 prósent sögðust frekar óánægð. Maskína hefur tekið stöðuna mánaðarlega síðan ný ríkisstjórn tók við og má sjá hvernig óánægja hefur aukist mikið samhliða málþófinu á Alþingi. Þar með eru rétt tæp 60 prósent þjóðarinnar óánægð með stjórnarandstöðuna.
Hvað ríkisstjórnina varðar eru 20,4 prósent mjög ánægð, 27,8 prósent frekar ánægð og 24,2 prósent í meðallagi ánægð. Aðeins 13,3 prósent segjast mjög óánægð með störf ríkisstjórnarinnar og 14,1 prósent fremur óánægð. Óánægja hefur aukist lítillega en á sama tíma hafa aldrei fleiri verið mjög ánægðir.
Ánægðastir eru kjósendur Samfylkingarinnar, en þar eru 84,5 prósent ánægð en aðeins 3,8 prósent óánægð. Óánægðastir eru kjósendur Lýðræðisflokksins þar sem enginn er ánægður og hjá kjósendum Sjálfstæðisflokks eru aðeins 12,6 prósent ánægðir með störf ríkisstjórnarinnar en 68 prósent óánægðir.
Hvað stjórnarandstöðuna varðar þá eru kjósendur Sjálfstæðisflokks ánægðastir, en 38,9 prósent sögðust ánægðir og aðeins 14,5 prósent eru óánægðir.
