Inga Sæland, félags- og húsnæðismálaráðherra, náði að koma Framsóknarmanninum Þórarni Inga Péturssyni rækilega úr jafnvægi á Alþingi í gær. Ekki er víst hvað ráðherra gerði til að framkalla þessi viðbrögð, en hún hafði gengið fram í þingsal þar sem ekki sást til hennar í útsendingu þingsins og Þórarinn sagðist ítrekað ekki ætla að ræða þetta frekar.
Það var skömmu eftir miðnætti sem Þórarinn steig í pontu til að fjalla, eins og svo oft áður, um fyrirhugaða leiðréttingu veiðigjalda. Þegar Þórarinn var um það bil hálfnaður með ræðu sína gengur Inga að Þórunni Sveinbjarnardóttur, forseta Alþingis, og ræðir við hana skamma stund. Svo gengur Inga fram í sal og gerir eitthvað sem kom Þórarni heldur betur úr jafnvægi og fær Þórunni auk þess til að springa úr hlátri.
Þórarinn snýr sér svo að Þórunni og virðist biðja um aðstoð: „Frú forseti!“ og slær Þórunn þá í bjöllu og segir við Ingu: „Það þarf að gefa þingmönnum frið í fleiri en einni merkingu þegar þeir hafa orðið.“
Þórarinn ræður varla við sig, hlær og sótroðnar í framan. „Ég ætla ekki að, frú forseti, ég ætla ekki að minnast á það hvað gekk hérna á“ segir Þórarinn og Þórunn þakkar honum fyrir það. Þórarinn reynir að halda ræðu sinni áfram en það tekur hann stund að jafna sig. „Ja hérna, hvurslags, ég biðst afsökunar,“ segir Þórarinn og forseti segist sýna þessu fullan skilning. „Hvað gengur eiginlega hér á?“ flissar þingmaðurinn áfram. „Þetta var nú alveg merkilegt“.
Svo lítur Þórarinn aftur út í sal og springur aftur úr hlátri og skömmu síðar virðist Þórunn benda ónefndum aðila í sal, mögulega Ingu, að drífa sig út með handabendingu. Þórarinn reynir aftur að halda áfram en tekur svo fram að þessi uppákoma muni nú sitja áfram í honum eitthvað áfram. „Ég ætla ekki að ræða hana frekar“.
Tekst þá Þórarni að ljúka ræðu sinni á því að hann ætli að virða tímamörk þrátt fyrir uppákomuna. „Það var áhugavert að fá þessa uppákomu hérna svona til að lífga upp á stemninguna í salnum þannig ég óska þess að vera settur að nýju á mælendaskrá.“
Atvikið á sér stað þegar um 1 mínúta og 50 sekúndur eru liðnar af ræðutíma. Eftir að frétt þessi fór í loftið skrifaði Inga Sæland í athugasemd á Facebook-síðu DV: „Ég sneri mér að ræðupúltinu, brosti til Þórarins og tók létt dansspor fyrir hann áður en ég gekk úr salnum.“
Uppákoma á Alþingi
