Helgi Fannar Sigurðsson skrifar frá Sviss

Þorsteinn Halldórsson er að margra mati kominn á endastöð með íslenska kvennalandsliðið eftir að það féll úr leik eftir aðeins tvo leiki í riðlakeppni EM. Liðið hefur tapað gegn Finnum og Sviss það sem af er.

„Ég fíla Steina mjög vel sem manneskju en miðað við hvernig þetta hefur verið þá sér maður ekki framfaraskref á liðinu. Mér finnst hann líka of íhaldssamur í leikmannavali. Hann treystir rosalega mikið á Blikastelpurnar, af hverju byrjar Hildur til dæmis á móti Finnlandi en ekki Dagný?“ segir Bjarni Helgason á Morgunblaðinu í hlaðvarpi 433.is um mótið.

Þorsteinn virðist sjálfur meðvitaður um að óvissa sé um hans framtíð. „Maður verður að hætta ef maður er ekki að standa sig vel,“ sagði hann í viðtali við RÚV beint eftir tapið gegn Sviss. Því var velt upp í þættinum hvort þarna hafi Þorsteinn verið að segja sjálfum sér upp, en daginn eftir sagði hann að vísu við fjölmiðla að hann hefði ekki leitt hugann að framtíð sinni.

„Ef liðið hefði verið frábært, væri að koma sér fimm opin marktækifæri í hverjum leik. Við erum með 0,24 í XG. Einu ógnirnar okkar á þessu móti hafi verið eftir löng innköst. Með þennan hóp, við verðum að gera meiri kröfur,“ segir Bjarni, sem vill erlendan landsliðsþjálfara.

„Ég vil fá einhvern erlendan þjálfara inn í þetta. Mér finnst íslenskir þjálfarar of fastir í því að við séum litla liðið. Ég held það væri bara flott að fá inn erlenda konu sem þekkir íslenska boltann ekkert allt of vel (og er því ekki með þetta hugarfar).“