Orri Steinn Óskarsson viðurkennir að það hafi verið snúið að vera með stanslausa orðróma um framtíð sína hangandi yfir sér síðasta sumar.

Landsliðsfyrirliðinn gekk í raðir Real Sociedad eftir frábær ár með FC Kaupmannahöfn síðasta sumar. Hann var orðaður víða fyrir skiptin, til að mynda við Manchester City.

„Það var mikið af orðrómum og fréttum og maður var að verða smá klikkaður á þessu,“ segir Orri í samtali við Vísi.

„Ég frétti af þessu með City en það var aldrei fyrsti kostur hjá mér að fara í eins stórt lið og mögulegt er, fá svo kannski ekki að spila og fara á lán. Ég vildi fara í lið þar sem ég er mikilvægur og möguleikarnir miklir.“

Orri er afar sáttur hjá Sociedad, sem hafnaði um miðja deild í La Liga á þessari leiktíð. Hann skipti á lokadegi félagaskiptagluggans síðasta sumar og var tímabilið í Danmörku þá komið á fullt.

„Tímabilið var byrjað og við að spila mikið af leikjum. Það var skrýtið að reyna að standa mig eins vel og hægt er með allt þetta í kringum mig, og liðsfélagarnir að spyrja og svona. Þetta er óþægileg staða en mér fannst ég ná ágætlega að ýta þessu frá mér og gera mitt besta. Það er líka því ég er með frábært fólk í kringum mig, kærustuna mína og foreldrana.“