Það er ekki ólíklegt að Elaina LaMacchia, markvörður Fram, sé á leið í leikbann fyrir groddaralegt brot í tapi gegn Þrótti á föstudag.

Leiknum lauk með 1-3 sigri Þróttar en snemma leiks hefði Elaina getað fengið reisupassann ef Bríet Bragadóttir dómari hefði séð þegar hún togaði Sæunni Björnsdóttur niður á hárinu.

„Markvörður Fram sýndi af sér ákaflega óíþróttamannslega framkomu í fyrri hálfleik og reif leikmann Þróttar niður á hárinu. Dómarar sáu ekkert og markvörður Fram fær því að standa í markinu í síðari hálfleik.

Þetta er glötuð framkoma hjá góðum markverði. Fer hún í bann þó ekkert hafi verið dæmt?“ skrifar Jón Ólafsson tónlistarmaður í hálfleik um málið, auk þess að birta myndband af því, en hann er harður stuðningsmaður Þróttar.

Ekki er ósennilegt að aganefnd KSÍ taki málið fyrir. Vísir vekur athygli á að Anna María Baldursdóttir, fyrirliði Stjörnunnar, hafi verið dæmd í tveggja leikja bann fyrir að toga í hár andstæðings fyrir tveimur árum. Í því tilviki, líkt og í þessu, fór atvikið framhjá dómara leiksins.

Undir færslu Jóns hér að neðan má sjá atvikið úr útsendingu SÝN, sem birtist á Vísi.