Esteve Calzada, framkvæmdastjóri sádiarabíska félagsins Al-Hilal, vildi ekki útiloka að félagið myndi reyna við Vinicius Junior hjá Real Madrid.

Brasilíska stórstjarnan hefur reglulega verið orðuð við Sádí, en þar í landi vilja menn stanslaust stækka vörumerkið sem knattpsyrnudeildin er, eins og sjá má á leikmönnum sem hafa komið undanfarin ár.

Það er þó talið að hinn 24 ára gamli Vinicius vilji vera áfram hjá Real Madrid þrátt fyrir gylliboð frá Sádí.

„Við höfum ekki talað beint við hann. Við getum þó leyft okkur að skoða alla leikmenn og þar á meðal Vinicius,“ sagði Calzada.

„Þegar við viljum leikmann hugsum við ekki út í það hvort hann vilji koma. Við setjum bara allt á fullt því við trúum á verkefnið, ekki bara peningana. Cristiano Ronaldo kom til Sádi-Arabíu svo nú ætti ekkert að koma okkur á óvart.“

Þess má geta að Real Madrid og Al-Hilal mætast í fyrsta leik sínum á HM félagsliða annað kvöld.