Harvard-háskóli hefur ákveðið að svipta einn fræðimann sinn æviráðningu og reka hana frá viðskiptadeild skólans. Fræðimaðurinn heitir Francesca Gino og hafði hún getið sér gott orð fyrir rannsóknir sínar á sviði heiðarleika og siðferðilegrar hegðunar. Því þykir nokkuð kaldhæðnislegt að brottrekstrarsökin séu ásakanir um akademísk misferli og svik.

Málið á sér langan aðdraganda en það var árið 2023 sem skólinn hóf innri rannsókn á vinnu Gino eftir að ásakanir voru viðraðar á bloggsíðunni Data Colada. Bloggsíðan er á vegum hóps atferlisfræðinga sem gaumgæfa vísindarannsóknir. Þessi innri rannsókn leiddi í ljós að Gino hafði í vissum tilvikum hagrætt gögnum til að styðja við tilgátur sínar. Að lokinni rannsókn var Gino vísað í launalaust leyfi en í vikunni var tekin ákvörðun um að svipta hana æviráðningunni (e. tenure).

Gino hefur harðneitað sök í málinu og hefur stefnt Harvard sem og Data Colada í skaðabótamáli þar sem hún fer fram á rúmlega þrjá milljarða í bætur fyrir meiðyrði, kynjamisrétti og brot gegn friðhelgi einkalífs. Hún segir að ásakanirnar hafi skaðað mannorð hennar til frambúðar sem og feril hennar. Dómari tók þó ekki undir með fræðimanninum og vísaði skaðabótakröfu hennar frá dómi í september með vísan til þess að Gino, sem fræðimaður, væri opinber manneskja og að gagnrýni á rannsóknir hennar nyti tjáningaverndar samkvæmt stjórnarskrá Bandaríkjanna.