Lið Fram hefur verið magnað í Lengjudeild karla í ár. Það stefnir hraðbyri upp í upp í Pepsi Max-deildina. Fram hefur ekki enn tapað leik á yfirstandandi tímabili. Kristján Óli Sigurðsson, sérfræðingur í hlaðvarpsþættinum Dr. Football, getur vel séð það halda áfram út leiktíðina.
Fram er á toppi deildarinnar með 35 stig, 9 stigum meira en ÍBV sem eru í öðru sæti og 12 stigum meira en Fjölnir sem er í því þriðja.
,,Framarar, velkomnir til baka,“ gerðist Hjörvar Hafliðason, þáttastjórnandi Dr. Football, svo djarfur að segja. Þarna bauð hann Fram velkomið aftur í deild þeirra bestu.
Kristján segir Safamýrapilta einfaldlega vera langbesta lið Lengjudeildarinnar.
,,Þeir geta hæglega farið taplausir í gegnum þetta mót, það er bara þannig. (Eru) með breidd og annað slíkt. Lang, langbesta liðið.“
