Grimsby Town, lið úr ensku fjórðu deildinni gerði sér lítið fyrir og sló Manchester United úr enska deildarbikarnum eftir vítaspyrnukeppni í síðustu viku. Síðar kom í ljós að liðið tefldi fram ólöglegum leikmanni.

Þetta var einn stærsti sigur í sögu Grimsby, sem varð fyrsta lið úr fjórðu deild sem slær Manchester United úr enskri bikarkeppni. Leiknum lauk með jafntefli og fór í vítaspyrnukeppni þar sem Grimsby hafði betur.

En eftir leikinn greindi félagið frá því að miðjumaðurinn Clarke Oduor, 26 ára, hafi verið skráður of seint til að fá leikheimild. Nákvæmlega einni mínútu eftir að skráningarfrestur EFL rann út kl. 12:00 daginn fyrir leik.

Oduor tók þátt í leiknum og var eini leikmaður Grimsby sem klikkaði í vítaspyrnukeppninni.

Grimsby greindi frá því að skráningarvillan hafi orðið vegna „tæknilegrar bilunar í kerfi félagsins“. Þegar mistökin komu í ljós tilkynnti félagið sjálft málið til EFL og hefur nú tekið ábyrgð á brotinu og samþykkt refsingu.

EFL hefur þó ákveðið að láta Grimsby halda sæti sínu í keppninni eftir ítarlega skoðun á öllum gögnum og fordæmum í sambærilegum málum í deildarbikarnum.

Í stað brottvísunar hefur EFL sektað félagið um 20.000 pund.

Það vekur athygli að hefði þetta átt sér stað í FA-bikarnum, þá hefðu reglur og fordæmi kveðið á um að Grimsby yrði útilokað og Manchester United fengið sætið sitt aftur. Barnsley lenti í slíku máli árið 2023 þegar þeir notuðu ólöglegan leikmann gegn Horsham, sem þá var dæmdur sigur í leiknum.