Óvissa ríkir enn um framtíð Kobbie Mainoo hjá Manchester United þrátt fyrir að miðjumaðurinn hafi fest sig í sessi í byrjunarliðinu á ný.

Samkvæmt Daily Mail hefur hinn 20 ára gamli Englendingur orðið „mun sáttari“ hjá félaginu en hann var síðasta sumar. Þá var hann sagður óánægður með lítið hlutverk sitt undir stjórn Ruben Amorim og hafði íhugað að yfirgefa uppeldisfélag sitt.

Fjöldi félaga sýndi honum áhuga á þeim tíma, meðal annars Chelsea og Napoli. Mainoo ákvað þó að vera áfram hjá Manchester United og sú ákvörðun hefur reynst honum vel, enda hefur hann fengið meira traust síðan Michael Carrick tók við liðinu.

Manchester United hefur einnig verið að skoða möguleikann á að bjóða honum nýjan langtímasamning. Samkvæmt fréttum gæti laun hans hækkað verulega, en hann þénar nú um 25 þúsund pund á viku.

Þrátt fyrir það eru enn ákveðin vandamál í samskiptum milli fulltrúa leikmannsins og stjórnenda félagsins. Talið er að Mainoo hafi áður samþykkt málamiðlun um laun, en félagið hafi ekki svarað honum fyrr en eftir að Amorim var rekinn í janúar.

Ef aðilar ná aftur saman í viðræðum eru þó taldar góðar líkur á að Mainoo skrifi undir nýjan samning og haldi áfram á Old Trafford.