Rodri, miðjumaður Manchester City, hefur opnað á möguleikann á að snúa aftur til Spánar í framtíðinni, en hann hefur verið orðaður við Real Madrid.

Spænska stórliðið hefur lengi haft áhuga á Ballon d’Or sigurvegaranum og talið er að félagið gæti reynt að fá hann í sumar. Rodri á eitt ár eftir af samningi sínum við City og viðræður um nýjan samning hafa ekki hafist, meðal annars vegna þess að hann var að jafna sig eftir alvarleg hnémeiðsli.

Í viðtali við útvarpsstöðina Onda Cero sagði Rodri að hann hefði áhuga á að snúa aftur í La Liga. „Mig langar að snúa aftur til Spánar einhvern tímann. La Liga er þar sem ég byrjaði,“ sagði hann en hann hefur verið orðaður við Real Madrid.

Hann viðurkenndi þó að enska úrvalsdeildin hefði verið honum mjög mikilvæg. „Þetta er mögnuð deild en líka mjög krefjandi. Hún ýtir manni alltaf til hins ýtrasta,“ bætti hann við.

Rodri gekk til liðs við Manchester City frá Atletico Madrid árið 2019 og hefur síðan verið lykilmaður í liði Pep Guardiola.