Chelsea tapaði 3-1 fyrir Arsenal í fyrri leik 8-liða úrslitanna í Meistaradeild kvenna. Sonia Bompastor, sem stýrir liði Chelsea, var mjög ósátt með dómgæsluna í leiknum.

Tvö mörk Chelsea voru dæmd af í leiknum og eftir hann sagði Bompastor að kvennaknattspyrnu þyrfti að sýna meiri virðingu með því að hafa almennilega dómara á leikjunum.

„Þetta er ekki nógu gott. Við þurfum að sýna kvennaknattspyrnunni virðingu. Leikmenn leggja hart að sér og það þarf hæft fólk að fara yfir atvik í leikjum,“ sagði Bompastor, en mörkin voru dæmd af eftir skoðun í VAR.

Chelsea mætir Arsenal aftur í seinni leiknum 1. apríl og reynir að snúa tveggja marka mun sér í hag.