Portúgalski markvarðaþjálfarinn Silvino Louro er látinn, 67 ára að aldri, eftir langvarandi veikindi.
Louro starfaði um árabil með Jose Mourinho og var einn af hans traustustu samstarfsmönnum. Þeir unnu saman hjá FC Porto, Chelsea, Inter Milan, Real Madrid og Manchester United.
Sem þjálfari átti Louro stóran þátt í þróun margra frábærra markvarða. Þar má nefna Vitor Baia, Petr Cech og Julio Cesar, sem allir voru valdir besti markvörður Evrópu á sínum tíma undir hans handleiðslu.
Eftir að fregnir bárust af andláti hans hafa fjölmargir fyrrum leikmenn og samstarfsmenn sent samúðarkveðjur. Petr Cech birti mynd af þeim saman og skrifaði einfaldlega „R.I.P.“.
Þá minntist John Terry hans með hlýjum orðum á samfélagsmiðlum og kallaði hann frábæran mann. Einnig sýndi David de Gea virðingu sína.
Louro var afar virtur innan knattspyrnuheimsins og skilur eftir sig stórt spor.
