Orri Steinn Óskarsson, fyrirliði íslenska landsliðsins, snýr loks aftur í leikjunum við Kanada og Haítí í lok mánaðar.

Framherjinn ungi missti af öllum leikjum Íslands í undankeppni HM í fyrra og saknaði liðið hans sárt. Hefur Orri glímt mikið við meiðsli frá því hann kom til Real Sociedad fyrir síðustu leiktíð en er nú kominn aftur út á völl.

„Það er búið að vera „heartbreaking“ að tala við hann núna í eitt ár. Hann er búinn að vera að brotna niður meiðslalega séð og vera á dimmum stað en þetta er bara svo þroskaður karakter. Hann hefur þroskast enn meira á þessu ári, ekki bara út af meiðslunum heldur eignaðist hann barn og þess háttar.

Ég á því von á mjög sterkum karakter og leikmanni sem kemur aftur til móts við hópinn. Hann er búinn að sýna það og sanna að hann á heima á mjög háu leveli með Real Sociedad,“ segir landsliðsþjálfarinn Arnar Gunnlaugsson við 433.is um Orra.

„Auðvitað höfum við saknað hans mikið. Hann mun lyfta upp okkar leik og gefa okkur nýjar víddir. Ég held að þetta sé byrjunin á mjög farsælum landsliðsferli hjá mér og honum.“

Ítarlegt viðtal við Arnar er í spilaranum.