Margir vilja meina að Alejandro Garnacho, leikmaður Chelsea hafi skotið á fyrrum félag sitt Manchester United í aðdraganda leiksins við Arsenal sem nú er að hefjast.

Garnacho gekk í raðir Chelsea frá United í sumar og er kantmaðurinn ungi ekki of vel liðinn á meðal stuðningsmanna Rauðu djöflanna.

Hann mætir Arsenal með Chelsea í seinni leik liðanna í enska deildabikarnum í kvöld, en Arsenal vann fyrri leikinn 2-3 á útivelli. Chelsea þarf því að sýna alvöru frammistöðu til að snúa einvíginu við í kvöld, en Garnacho vakti athygli á að United hafi unnið á heimavelli Arsenal á dögunum.

„Allir vita hversu erfitt það er að spila þar. Eftir fyrri leikinn heyrði ég marga segja að enginn gæti unnið á Emirates. En nú er staðan aðeins önnur. Ef Manchester United getur unnið þar, þá getum við það líka,“ sagði hann og margir stuðningsmenn United taka þessu sem sneið.