Elmar Kári Cogic gæti spilað með ÍA í Bestu deildinni á komandi leiktíð, en félagið hefur boðið í hann. Albert Brynjar Ingason, sérfræðingur í Dr. Football, segir frá þessu.

Hinn 24 ára gamli Elmar sló í gegn með Aftureldingu í Lengjudeildinni og þó hann hafi ekki alveg fylgt því eftir eins og búist var við í Bestu deildinni á síðustu leiktíð, þar sem Mosfellingar féllu aftur, er hann enn eftirsóttur.

Albert segir Skagamenn hafa boðið í hann áður, en því tilboði hafi verið hafnað. Er meiri bjartsýni á að tilboðið nú verði samþykkt.

ÍA hefur styrkt sig afar vel í vetur og ætlar sér greinilega stóra hluti í Bestu deildinni í sumar.