Michael Carrick, bráðabirgðastjóri Manchester United, segist þekkja söguna af stuðningsmanninum sem hefur heitið því að klippa sig ekki fyrr en liðið vinnur fimm deildarleiki í röðl, en hann segir hana ekki verða hluta af ræðunni fyrir leik.
Stuðningsmaðurinn Frank Ilett hefur ekki farið í klippingu síðan 5. október 2024 eftir að hafa heitið því að láta hárið vaxa þar til United næði fimm sigrum í röð í úrvalsdeildinni. United vann sinn fjórða leik í röð um helgina gegn Tottenham og er því aðeins einum sigri frá því að heit Iletts rætist.
United er nú í fjórða sæti deildarinnar, en næsti leikur er gegn West Ham á útivelli í kvöld.
Sagan er þó ekki með United þar, því liðið hefur tapað síðustu þremur leikjum sínum á London Stadium. Síðasti sigur þar kom í september 2021, þegar Carrick var í þjálfarateyminu hjá Ole Gunnar Solskjær.
Carrick var spurður út í málið og svaraði léttur. „Ég get sagt að ég viti af þessu, já. Krakkarnir mínir hafa látið mig vita ef eitthvað er.“
Hann bætti við. „Þetta fer þó ekki inn í liðsræðuna á faglegum grunni. En ég skil þetta og það fær mig til að brosa. Það mun þó ekki hafa áhrif á leikinn að lokum.“
Stuðningsmenn fylgjast nú spenntir með hvort röðin haldi áfram og hvort hárið fari loksins.
