Bjarni Helgason stjörnublaðamaður Morgunblaðsins skrifar skemmtilega grein í blað dagsins. Þar fer hann yfir tíðindin þriðjudagsins þegar Liverpool staðfesti að Mo Salah færi frá félaginu í sumar.

Salah skipar sér í hóp bestu leikmanna í sögu Liverpool, hann hefur hins vegar ekki fundið taktinn í ár og fær að fara frítt frá félaginu næsta sumar.

„Ég sat uppi í sófa með sjö ára gömlum syni mínum þegar ég sá tilkynningu frá Englandsmeisturum Liverpool um að egypski knattspyrnumaðurinn Mohamed Salah væri á förum frá félaginu í sumar. „Nei, nei, nei, Salah er að fara,“ sagði ég ósjálfrátt upphátt við son minn sem lá eins og klessa, alveg upp við mig í sófanum,“ skrifar Bjarni í Morgunblaðið í dag.

Sonur Bjarna var fljótur til svars. „Hann var fljótur til svars: „Hann er ekki uppáhaldsleikmaðurinn minn lengur. Hvað er hann að pæla að yfirgefa Liverpool?“ svaraði hann á móti.“

Bjarni rekur svo magnaðan árangur Salah í treyju Liverpool og segir. „Þó að maður hafi reiknað með því að Salah myndi fara í sumar þá var það samt skellur að fá það staðfest. Ég þekki hann ekki neitt en eins fáránlegt og það hljómar þá hefur hann átt svo stóran þátt í mörgum gleðistundum hjá mér undanfarin níu ár að það er hálfvandræðalegt.“