Alexander Isak hefur í fyrsta sinn tjáð sig opinberlega eftir 22 milljarðar króna félagaskipti hans frá Newcastle til Liverpool voru staðfest á lokadegi gluggans.

Framtíð Isak var helsta umfjöllunarefnið í enska glugganum í sumar eftir að hann neitaði að mæta á æfingar og spila leiki með Newcastle til að knýja fram skiptin til Anfield.

Eftir að skiptin gengu í gegn hélt Isak beint í landsliðsverkefni með Svíþjóð fyrir komandi leiki í undankeppni HM.

Hann sat allan tímann á bekknum í 2-2 jafntefli Svíþjóðar gegn Slóveníu á föstudag, en kom inn á á 72. mínútu í tapleik gegn Kosóvó í gær.

Þetta var fyrsti leikur Isak síðan hann spilaði með Newcastle þann 25. maí og náði hann ekki að setja mark sitt á leikinn. Hann fékk einnig að líta gula spjaldið.

Í samtali við sænska fjölmiðla sagði Isak: „Fólk veit ekki alla söguna, en það er umræða sem ég mun taka síðar. Ég stjórna ekki því sem er sagt eða skrifað en ég er ánægður með að vera orðinn leikmaður Liverpool,“ sagði Isak.

Hann bætti við: „Það var gott að hafa klárað skiptin fyrir landsliðsverkefnið svo ég gæti einbeitt mér að því að spila fótbolta. Þetta var ný staða fyrir mig, en maður lærir og þroskast líka andlega utan vallar.“