Wayne Rooney hefur deilt vandræðalegri sögu úr tíð sinni hjá Manchester United þegar Louis van Gaal, þáverandi knattspyrnustjóri félagsins, hitti eiginkonu hans, Coleen, í fyrsta sinn.
Van Gaal stýrði United á árunum 2014 til 2016 og átti gott samband við Rooney, sem hann gerði að fyrirliða liðsins um leið og hann tók við.
Rooney lék 79 leiki undir stjórn hins hollenska þjálfara, skoraði 29 mörk og vann FA-bikarinn árið 2016 á síðasta tímabil Van Gaal með félaginu.
Í nýjasta þætti af hlaðvarpi sínu, The Wayne Rooney Show, rifjaði Rooney upp fyrsta kynni Van Gaal og Coleen og hvernig það fór heldur óvenjulega af stað.
„Ég elskaði hann, hann var svo fyndinn,“ sagði Rooney.
„Fyrsta skiptið sem hann hitti Coleen var í hádegisverði með leikmönnum, eiginkonum, kærustum og starfsfólki.
Hann gekk beint að Coleen og sagði. „‘Börnin ykkar líkjast Wayne mjög mikið’. Hún svaraði: ‘Já’, og þá sagði hann: ‘Hann hlýtur að vera með mjög öflugt sæði.’ Þetta var fyrsta samtalið þeirra.“
Rooney hefur áður lýst Van Gaal sem „háværum og lífsglöðum karakter“ og þessi saga virðist staðfesta það svo ekki verður um villst.
