Brasilíski kantmaðurinn Antony, sem átti misheppnaða dvöl hjá Manchester United, hefur nú loksins yfirgefið félagið og gengið aftur til liðs við Real Betis en hann staðfestir að Bayern München hafi einnig reynt við hann.
Betis greiddi 21 milljón punda fyrir Antony á lokadegi félagaskiptagluggans, eftir langvarandi samningaviðræður við Manchester United.
Í viðtali við spænska þáttinn El Partidazo opinberaði Antony að þýska stórliðið hafi haft samband, en að hann hafi haldið sig við fyrirheit sitt við spænska félagið.
„Ég talaði við Bayern München,“ sagði Antony.
„Þeir buðu mér 7 milljónir evra á ári, sem er miklu meira en ég fæ hjá Betis. Ég sagði að ég hefði gefið loforð til Betis og að það væri 95% öruggt og að ég myndi standa við mitt. Ég er mjög sáttur við þessa ákvörðun, því ég er virkilega hamingjusamur hér.“
Hann bætti við að áhuginn hafi verið víðtækur: „Fleiri en fimm lið höfðu samband við mig.“
Antony, 25 ára, átti glæsilega fyrri dvöl hjá Betis þar sem hann skoraði 9 mörk og lagði upp 5 í aðeins hálfu tímabili þegar hann fór á láni í janúar. Hann vonast nú til að ná enn betri árangri í seinna skiptið.
