Mohamed Salah, sóknarmaður Liverpool, hefur brugðist við umdeildri færslu á samfélagsmiðlinum X (áður Twitter), þar sem stuðningsmannasíða taldi að félagið hefði gert „mestu bætingu í sögu fótboltans“ með kaupum á nýjum sóknarmönnum.

Aðgangurinn Anfield Edition, vinsæl stuðningsmannasíða, birti færslu þar sem því var haldið fram að kaup á Florian Wirtz og Alexander Isak fyrir samtals 241 milljón punda væru mikil uppfærsla miðað við Luis Díaz og Darwin Núñez sem seldir voru í sumar. Báru þeir númerin sem Wirtz og Isak tóku við.

Salah, sem hefur verið lykilmaður hjá Liverpool í mörg ár, tók ekki vel í þá framsetningu sérstaklega þar sem Díaz og Núñez spiluðu lykilhlutverk í því að tryggja Arne Slot og liðinu enska meistaratitilinn á síðustu leiktíð.

Hann svaraði beint með því að endurbirta færsluna og bæta við: „Hvernig væri að við fögnum þessum frábæru nýju leikmönnum án þess að vanvirða Englandsmeistarana?,“ sagði Salah

Ummæli Salahs vöktu mikla athygli á samfélagsmiðlum og margir stuðningsmenn tóku undir með honum um að slíkur samanburður væri bæði ósanngjarn og óþarfur.

How about we celebrate the great signings without disrespecting the PL champions? https://t.co/lRug6oFYCt

— Mohamed Salah (@MoSalah) September 3, 2025