Manchester United goðsögnin Rio Ferdinand rifjaði upp á dögunmum þegar Gabriel, leikmaður Arsenal, sendi honum skilaboð á samfélagsmiðlum.

Ferdinand sagði að brasilíski miðvörðurinn, sem er í fremstu röð í dag, hafi sent sér skilaboð í kjölfar gagnrýni í sjónvarpinu.

„Ég hef notið þess að horfa á Gabriel undanfarið. Hann er svo ákveðinn og að horfa á hann gegn Liverpool minnti mig á að hann sendi mér einu sinni skilaboð,“ rifjaði Ferdinand upp eftir 1-0 tap Arsenal gegn Liverpool.

„Þá hafði hann fengið dæmt á sig víti undir lok tímabils. Hann tók nokkrar slakar ákvarðanir. Ég sagði að ef hann vildi verða háklassaleikmaður yrði hann að hætta að vera fljótfær á mikilvægum augnablikum.

Þá sendi hann mér að ég hefði aldrei spilað leikinn miðað við hvernig ég talaði. Hann sagðist virða mig en að ég væri ekki sanngjarn. Ég skildi það því mér leið svoleiðis þegar sérfræðingar töluðu um mig.

Ég held að hann muni sjá að ég hafði rétt fyrir mér með tímanum. Ég sé nú að þetta er þáttur í hans leik sem hann hefur bætt mikið. Reynsla, tími og þolinmæði er það sem þessir drengir þurfa.“