Jón Dagur Þorsteinsson virðist vera kominn inn í myndina hjá þýska félaginu Hertha Berlin á nýjan leik. Liðinu gengur hins vegar ekki nógu vel.

Jón Dagur gekk í raðir Hertha fyrir síðustu leiktíð, en liðið leikur í B-deildinni. Íslenski landsliðsmaðurinn spilaði ansi lítið á sinni fyrstu leiktíð en hefur nú byrjað þrjá leiki í röð.

„Mér líður frábærlega í höfuðborginni en ég fékk auðvitað ekki mikið að spila á síðasta tímabili. Mér er persónulega búið að ganga fínt á þessu tímabili og fengið að spila meira. En liðið er ekki að byrja vel sem er ekki gott. Vonandi snúum við þessu við og gerum atlögu að því að komast upp,“ segir Jón Dagur við 433.is.

En hvað breyttist í sumar?

„Ég átti bara gott spjall við þjálfarann áður en ég fór í sumarfrí. Ég skoðaði auðvitað mína stöðu þar sem ég spilaði lítið, það er bara eðlilegt. En eftir spjallið og hvernig hann sá mitt hlutverk á þessu tímabili ákvað ég að kýla á þetta.“

Hertha er aðeins með tvö stig eftir fjóra leiki á þessari leiktíð. Liðið er stórt og spilar á 75 þúsund manna heimavelli, Ólympíuleikvangingum í Berlín. Þetta er því varla ásættanlegt.

„Við þurfum heldur betur að fara að rífa okkur í gang, þetta er í raun ekki boðlegt,“ segir Jón Dagur.

Ítarlegra viðtal er í spilaranum.