„Þetta er geggjuð tilfinning. Þetta er heiður og ég er stoltur af því að vera hérna. Þetta er bara draumur,“ segir Daníel Tristan Guðjohnsen, sem fékk landsliðskallið í fyrsta sinn á dögunum.

Ísland er á leið í fyrstu leiki undankeppni HM, gegn Aserbaísjan hér heima og svo Frökkum úti.

„Ég er þvílíkt spenntur. Aserbaídsjan heima, við ætlum að vinna hann. Svo ætlum við að sýna okkur í Frakklandi og reyna að ná í einhver úrslit,“ segir þessi 19 ára gamli sóknarmaður.

Andri Lucas Guðjohnsen, bróðir Daníels, er líka í hópnum. Það þarf ekki að kynna lesendur fyrir fjölskyldunni sem þeir tilheyra og þeirri miklu knattspyrnuhefð sem þar ríkir.

„Það er bara geggjað. Við erum til staðar fyrir hvorn annan. Þetta er bróðir minn og ég vil allt það besta fyrir hann. Hann hefur hjálpað mér aðeins meira en ég honum held ég,“ segir Daníel léttur í bragði.

„Afi var í fótbolta og pabbi, svo á ég tvo eldri bræður og mamman hefur líka verið partur af þessu öllu. Hún reynir að hjálpa okkur eins mikið og hún getur.“