Arnar Gunnlaugsson, landsliðsþjálfari Íslands, kallar eftir faglegri umræðu um starf sitt og val hans á leikmönnum. Hann segir það ekki faglegt að vaða í sig fyrir það að velja leikmenn sem eru með Stellar sem umboðsmenn.

Bjarki Gunnlaugsson, bróðir Arnars, starfar hjá stærstu umboðsskrifstofu landsins og þar eru margir landsliðsmenn skjólstæðingar hans.

Frá því að Arnar tók við hefur umræðan farið reglulega af stað og fór aftur af stað þegar Arnar valdi hópinn sem nú er komin saman til að undirbúa sig fyrir undankeppni HM.

Meira:
Furða sig á ýmsu í vali Arnars – „Það hefur greinilega mikið gerst“

„Svo lengi sem það sé fagmannleg umræða, ekki koma með eitthvað svona að ég sé að velja Stellar leikmenn frekar en aðra. Þá ertu komin út í algjöra þvælu, umræðan ekki fagleg,“ sagði Arnar í Chess after Dark.

Arnar segir að þetta sé leið fyrir suma til að auglýsa þætti sem þeir eru með.  „Menn þurfa að auglýsa þættina sína og allt svoleiðis, ég hef alveg fullan skilning á því. En þetta er ekki fagleg umræða, þetta er bara bull í raun og veru.“

„Ég held að allt svona tali sínu máli, það eru einhverjir tíu sem eru sammála þessu. Svo eru þúsund manns sem eru alvöru knattspyrnuáhugamenn sem vita betur, ég held að ég þurfi ekki að svara fyrir þetta.“