Gísli Gottskálk Þórðarson er í fyrsta sinn í íslenska landsliðshópnum, sem hefur leik í undankeppni HM gegn Aserbaídsjan á föstudag. Hann er stoltur af því að hafa verið valinn.

Gísli, sem er aðeins tvítugur, sló í gegn með Víkingi hér heima áður en hann var keyptur til pólska stórliðsins Lech Poznan í ársbyrjun. Þar er hann kominn í stórt hlutverk og er nú mættur í landsliðið.

„Ég er stoltur og ánægður með að vera kominn hingað. Þetta er eitthvað sem maður stefnir alltaf að sem íslenskur fótboltamaður og ég er mjög glaður með að fá fyrsta tækifærið,“ sagði kappinn við 433.is á liðshóteli Íslands í dag.

„Ég tók fyrstu æfinguna áðan. Þetta er geggjaður hópur, mjög þéttur hópur og andinn er góður. Við erum búnir að fara vel yfir taktíkina og gera okkur klára í leikinn.“

Það er mjög mikilvægt fyrir Ísland að vinna Aserbaídsjan, sem er lægst skrifaða lið undanriðilsins, sem inniheldur einnig Frakkland og Úkraínu.

„Þetta er gott lið, eru með mikið af leikmönnum í Qarabag sem eru komnir inn í Meistaradeildina. Flestöll landslið eru með mikið af gæðum inn á milli en á sama tíma er þetta leikur sem við teljum okkur eiga góðan möguleika á að klára.

Við erum alveg hreinskilnir með það gagnvart okkur sjálfum, við verðum að vinna þennan leik, fara vel af stað og fara til Frakklands með góð úrslit.“

Ítarlegt viðtal er í spilaranum.