Sir Alex Ferguson hefur opinberað að hann hafi átt erfitt með að yfirgefa húsið eftir að eiginkona hans til nær 60 ára, Lady Cathy, lést í október fyrir tveimur árum.

Cathy Ferguson lést þann 5. október 2023, 84 ára að aldri. Hún og Sir Alex voru gift í 57 ár og áttu saman þrjú börn og tólf barnabörn.

Hún var hans stoð og stytta, að eigin sögn, og hjúkraði honum eftir heilablóðfall hans árið 2018, fimm árum eftir að hann lét af störfum sem stjóri Manchester United.

Ferguson segir frá því að sorgin hafi haft djúp áhrif. „Eftir að eiginkona mín lést sat ég mikið heima. Ég flutti út í sveit, við hliðina á syni mínum, en það dugði ekki að horfa bara á sjónvarpið,“ sagði hann í viðtali við BBC.

„Ég ákvað að ferðast, fór til Sádi-Arabíu, Hong Kong og Barein. Maður verður að halda sér virkum. Það að vinna með fólki með heilabilun hefur líka hjálpað mér, það veitir mér tilgang.“

Ferguson seldi lúxusheimili sitt í Cheshire fyrir 3,25 milljónir punda í apríl í fyrra og flutti í nýtt hús í rólegu þorpi, í nágrenni við son sinn Darren Ferguson, sem er einnig knattspyrnustjóri.

Lady Cathy er víða talin hafa átt lykilhlutverk í velgengni Fergusons, sem stýrði Manchester United til 13 Englandsmeistaratitla og gerði félagið að stórveldi í enskri knattspyrnu.