Knattspyrnumaðurinn Marcos Olmedo er látinn, aðeins 26 ára gamall, eftir hræðilegt bílslys í Ekvador á sunnudagsmorgun.

Olmedo var leikmaður Mushuc Runa í heimalandinu, hann lést í framanákeyrslu á E20-hraðbrautinni í Quinindé. Tveir aðrir menn, 30 og 34 ára, létust einnig í slysinu sem átti sér stað þegar pallbíll fór yfir heila línu og klessti á bíl sem kom úr gagnstæðri átt. Öryggismyndavélar náðu upptöku af árekstrinum.

Þegar viðbragðsaðilar komu á vettvang var ljóst að ekki var hægt að bjarga lífi þeirra sem í slysinu lentu.

Olmedo var frá Guayaquil og lætur eftir sig eiginkonu sína Evelyn Clavijo og þriggja ára son þeirra, Lemarcus. Evelyn birti hjartnæma færslu á Facebook þar sem hún minnist eiginmanns síns með mikilli sorg.

„Þeir sem þekktu Marcos Olmedo vita hvers konar maður hann var. Hann kenndi mér að maður á að gefa það sem þarf ekki bara það sem er afgangs,“ skrifaði hún.

Evelyn lýsti því að þau hefðu kynnst fyrir tæpum sjö árum og síðan gifst. Hún bætti við „Hann var hræddur við að treysta öðrum fyrir fyrsta syni sínum, svo ég helgaði mig Lemarcusi. Með hjartað í þúsund molum skrifa ég þessi orð.“

Í annarri færslu skrifaði hún: „Hvernig á ég að jafna mig á þessu, ást lífs míns. Hvernig útskýri ég þetta fyrir syni okkar? Þetta brýtur sál mína. Hvíldu í friði, elsku ástin mín.“