Manchester United virðist opið fyrir því að selja Kobbie Mainoo fyrir rétt verð. The Athletic segir frá.

Mainoo hefur verið orðaður við nokkuð óvænta brottför frá Manchester United undanfarna daga, í kjölfar þess að hafa ekki fengið tækifærið í liði Ruben Amorim í upphafi tímabils.

Miðjumaðurinn var afar spennandi er hann kom upp úr yngri liðum United en svo virðist sem hann sé ekki alveg inni í myndinni hjá Amorim, sem tók við síðla síðasta hausts.

Mainoo er pirraður á stöðu mála og sagði Daily Mail frá því í gær að tíu félög væru að skoða hann, Chelsea væri hvað líklegast til að hreppa hann ef han fer.

Þó voru einnig fleiri félög nefnd til sögunnar, til að mynda Bayern Munchen, Juventus og Real Madrid, en The Athletic segir einmitt að Mainoo sé spenntari fyrir því að fara í lið utan Englands.

Þá kemur þar einnig fram að United sé til í að skoða tilboð upp á 45 milljónir punda eða meira.