Jarell Quansah skoraði í sínum fyrsta deildarleik fyrir Bayer Leverkusen í gær er liðið mætti Hoffenheim í efstu deild Þýskalands.

Quansah kom til Leverkusen í sumar en hann var keyptur frá Liverpool þar sem hann hafði spilað allan sinn feril.

Varnarmaðurinn kom boltanum í netið á sjöttu mínútu en því miður fyrir hann og hans menn þá dugði það mark ekki til.

Hoffenheim skoraði síðar tvö mörk og vann 2-1 útisigur og byrjar Erik ten Hag ekki vel sem stjóri þýska liðsins.

Quansah heiðraði minningu Diogo Jota er hann fagnaði marki sínu en þeir léku saman hjá Liverpool.

Jota lést í sumar í hræðilegu bílslysi á Spáni en hann lét þar lífið ásamt bróður sínum Andre.