Alexander Isak, leikmaður Newcastle, birti beitta yfirlýsingu á samfélagsmiðla sína í kvöld í kjölfar þrálátra sögusagna um framtíð hans.

Isak er sterklega orðaður við Liverpool og vill fara þangað. Neitar framherjinn að æfa með Newcastle og hefur hann mikið verið gagnrýndur fyrir.

Hann gagnrýnir Newcastle harðlega í yfirlýsngunni í kvöld og gefur í skyn að félagið hafi komið af stað allt annarri sögu en sú sem er byggð á sannleikanum.

Þess má geta að Isak birti færsluna í kjölfar þess að hafa verið valinn í lið síðustu leiktíðar í ensku úrvalsdeildinni af leikmönnum deildarinnar.

„Ég er stoltur af því að aðrir leikmen velji mig í lið ensku úrvalsdeildarinnar fyrir síðustu leiktíð. Ég vil þakka liðsfélögum mínum og öllum hjá Newcastle sem hafa stutt mig á leiðinni hingað,“ segir Isak.

„Ég mætti ekki á hátíðina í kvöld vegna alls þess sem er í gangi. Ég hef þagað lengi og látið aðra um að tala. Það hefur orðið til þess að fólk hefur búið til sína eigin útgáfu af sögunni, þó svo að það viti að hún er ekki sönn, að það sé ekki það sem samið var um á bak við tjöldin.

Loforð voru gefin og félagið hefur vitað stöðuna lengi. Að láta eins og allt sé að koma upp núna gefur ranga mynd af stöðunni. Þegar loforð eru brotin og traustið horfið er ekki hægt að halda samstarfi áfram. Þess vegna er best fyrir alla að breyta til.“

Newcastle hafnaði 110 milljóna punda tilboði Liverpool á dögumum. Má búast við að annað muni berast. Liðin eigast við í úrvalsdeildinni um helgina.