Eysteinn Pétur Lárusson, framkvæmdastjóri KSÍ, segir að ungir karlmenn séu sá hópur sem er í mestri hættu með að þróa með sér spilavanda. Hann kallar eftir skýrari og harðari lagasetningu í þessum efnum því erlendar veðmálasíður, sem eru ólöglegar á Íslandi, starfi þó hér óáreittar.

Þetta kemur fram í aðsendri grein á Vísi. Eysteinn skrifar:

„Erlendar veðmálasíður eru í dag ólöglegar á Íslandi, en starfa þó hér óáreittar þar sem unglingum undir lögaldri hefur tekist að stofna reikninga, leggja inn peninga og spila. Það er staðreynd sem ætti að hvetja stjórnvöld til að bregðast við strax. Við þurfum leikreglur sem virka í raun, ekki bara á pappír. Lögin verða að endurspegla þann veruleika sem við búum við í stafrænum heimi, þar sem allt er aðgengilegt með örfáum smellum.“

Eysteinn segir enn fremur:

„Rannsóknir sýna að ungir karlmenn eru í mestri hættu á að þróa með sér spilavanda. Þegar þeir verða fyrir stöðugum áhrifum frá veðmálamarkaðnum, beint eða óbeint, eykst áhættan. Þessi þróun hefur þegar haft alvarlegar afleiðingar víða erlendis og við sjáum merki hennar hér heima, þó veðmál séu stunduð í mun minna mæli á Íslandi en í mörgum öðrum löndum í Evrópu eins og kemur fram í nýlegri könnun sem unnin var fyrir KSÍ.“

Stjórnvöld verða að tryggja betri lagasetningu

Eysteinn segir að stjórnvöld verði að tryggja að gildandi lög verji börn og ungmenni í raun fyrir ólöglegri veðmálastarfsemi með skilvirkum aðgerðum.

Hann hvetur jafnframt til þess að foreldrar ræði við börn sín um hættur veðmála og að félög bjóði upp á fræðslu fyrir unga iðkendur og leikmenn, þjálfara, dómara og aðra sem koma að knattspyrnu.

Greinina má lesa hér.