Giovanni van Bronckhorst, fyrrum leikmaður Arsenal, er á leið til Englands á ný en frá þessu greina bæði hollenskir og enskir miðlar.
Van Bronckhorst lék með Arsenal frá 2001 til 2004 en hélt síðar til Barcelona og endaði ferilinn hjá Feyenoord.
Hann þjálfaði síðar Feyenoord í fjögur ár og hefur einnig stoppað í Kína ásamt því að þjálfa Rangers og Besiktas í stutta stund.
Greint er frá því að Van Bronckhorst verði ný hægri hönd Arne Slot hjá Liverpool eftir brottför John Heitinga sem er orðinn stjóri Ajax í Hollandi.
Van Bronckhorst lék 106 landsleiki fyrir Holland á sínum tíma og býr yfir gríðarlega mikilli reynslu sem mun nýtast Englandsmeisturunum vel.
