Tottenham ætlar sér stóra hluti á félagaskiptamarkaðnum í kjölfar hörmunga sinna í ensku úrvalsdeildinni á leiktíðinni, sem og ráðningar á nýjum stjóra.

Tottenham hafnaði í 17. sæti ensku úrvalsdeildarinnar en vann Evrópudeildina og verður því í Meistaradeildinni á næstu leiktíð. Það dugði ekki til þess að Ange Postecoglou héldi starfi sínu.

Thomas Frank var í gær kynntur sem arftaki hans og nú má ætla að félagið hefjist brátt handa á félagaskiptamarkaðnum. Svo gæti farið að Tottenham kaupi sinn dýrasta leikmann í sögunni, en félagið hefur augastað á Antoine Semenyo hjá Bournemouth samkvæmt Fabrizio Romano.

Kantmaðurinn átti gott tímabil með Bournemouth, skoraði 11 mörk og lagði upp 5 í 37 leikjum. Bournemouth vill helst ekki selja hann. Félagið hefur þegar selt Dean Huijsen á 50 milljónir punda til Real Madrid og er Milos Kerkez sterklega orðaður við brottför.

Fari svo að félagið selji Semenyo verður það ekki fyrir minna en upphæð í kringum 70 milljónir punda. Gangi Tottenham að þeim verðmiða yrði hann sá dýrasti í sögunni, en sem stendur er það Dominic Solanke, sem var einmitt keyptur frá Bournemouth síðasta sumar. Framherjinn kostaði 55 milljónir punda, með möguleika á 10 til viðbótar.

Samkvæmt fréttum frá Englandi hefur Manchester United þó einnig augastað á Semenyo.