Mikael Nikulásson og Kristján Óli Sigurðsson hafa áhyggjur af íslenska landsliðinu og segja allan stöðugleika vanta svo liðið geti aftur farið að ná árangri.
Undankeppni Heimsmeistaramótsins hefst í haust þar sem íslenska liðið leikur sex leiki þar sem allt er undir.
Íslenska liðið tapaði æfingaleik gegn Norður-Írum á þriðjudag. „Það hefur verið saga landsliðsins, ekki bara hjá Arnari. Við byrjum vel en svo fjarar undan þessu, þessi leikur var í heildina endurtekning á mörgum leikjum síðustu 3-4 ár. Ég verð því miður að setja þetta á leikmennina, þetta eru sömu leikmenn og ég hef horft á síðustu ár. Þetta var arfaslakt, þegar þú tapar baráttu þá fer annað að klikka,“ sagði Mikael í Þungavigtinni í dag.
Mikael óttast það hvernig leikmenn horfa á hlutina. „Það sem hræðir mig mest er að leikmenn virðast ekki sjá þetta, leikmenn mæta í viðtöl eftir leiki og segja að þetta sé á uppleið eftir slaka leiki. Það þurfa að verða breytingar hjá landsliðinu.“
Kristján efast um það að nokkur möguleiki sé á því að Ísland komist á HM. „Ég efast um það, við getum ekki unnið tvo landsleiki í röð. Við vinnum Skotana en það hefði verið 1-1 hefði verið Coke Zero dolla í markinu, við sköpum okkur ekkert gegn Norður-Írum.“
„Mér finnst Hákon vera að spila út úr stöðu, hann á að vera á miðsvæðinu. Sóknarleikurinn á að snúast um hann og Albert, svo Orri eða Andri Lucas með þeim. Arnar segist ætla að fara á HM og þeir ráði því hvort þeir ætli með, þeir fara í hópferð sem áhorfendur ef þetta verður svona.“
Mikael ræddi svo aðeins meira hlutina og þá leikmenn sem gætu verið í vandræðum í bókum Arnars. „Ég spyr mig, það er hægt að henda einhverjum út úr hópnum. Logi var slakur í þessum leik, Willum verið slakur í mörgum leikjum í röð, Arnór Ingvi var slakur. Þeir gætu farið út úr hóp, Jón Dagur er ekki að spila með félagsliði. Fínn í fótbolta en spilar lítið.“
„Hákon Arnar er bara þarna í liðinu til að hafa hann í liðinu, hann getur ekki verið á kantinum.“
