Það er enn óljóst hvort Crystal Palace fái að taka þátt í Evrópudeildinni á næstu leiktíð, en verið er að vinna að lausn.

Palace vann sér inn þátttökurétt í Evrópudeildinni á næstu leiktíð með því að vinna enska bikarinn, sinn fyrsta stóra titil, í vor.

Eins og staðan er núna má liðið hins vegar ekki taka þátt þar vegna eignarhalds John Textor. Hann á 43 prósent í Palace en á einnig hlut í franska félaginu Lyon, sem tekur þátt í Evrópudeildinni. Ekki er heimilað að eiga meira en eitt félag í sömu keppni.

Verði Palace dæmt úr Evrópudeildinni gengur heldur ekki að liðið verði fært niður í Sambandsdeildina. Er það vegna þess að David Blitzer, sem einnig á hlut í félaginu, er meirihlutaeigandi í danska stórliðinu Bröndby, sem tekur þátt í keppninni.

Einn möguleikinn er því að Palace verði dæmt úr Evrópukeppnum yfirhöfuð, Nottingham Forest, sem vann sér inn þátttökurétt í Sambandsdeildinni, fari upp í Evrópudeildina og að Brighton fái Sambandsdeildarsæti.

The Athletic segir nú frá því að verið sé að reyna að bjarga málunum með því að Textor selji hlut sinn í Palace. Eigendahópur frá Bandaríkjunum hyggst bjóða 200 milljónir dollara. Annar Bandaríkjamaður á þá að hafa boðið í félagið en var ekki til í að greiða uppsett verð.

Fari svo að Textor selji sinn hlut til bandaríska hópsins ætti þó enn eftir að samþykkja það af ensku úrvalsdeildinni og UEFA, áður en ákvörðun verður svo tekin um hvort Palace fái að taka þátt í Evrópudeildinni.

Þá segir í umfjöllun Sky Sports að UEFA vilji láta dæmið ganga upp og komast að lausn svo Palace fái að taka þátt í Evrópudeildinni á næstu leiktíð.