Sverrir Ingi Ingason, miðvörður Íslands, var að vonum svekktur með 1-0 tap gegn Norður-Írum í vináttulandsleik í kvöld.
„Það eru vonbrigði að tapa. Við áttum ekki að tapa og fengum færi til að skora. Við vorum ekki nógu ruthless í báðum teigum.
Við héldum í strúktúr í fyrri hálfleik. Við vorum með tök á leiknum en án þess að ná að skapa okkur mikið. Við þurfum að koma okkur í betri stöður á þeirra vallarhelmingi og fá eitthvað meira út úr því að hafa boltann,“ sagði Sverrir við Stöð 2 Sport eftir leik.
Þetta var síðasti leikur Íslands áður en alvaran tekur við í undankeppni HM í haust. Sverrir segir liðið hafa fengið svör fyrir þá leiki.
„Við fengum fullt af svörum í dag, hvað við getum gert og hvað við þurfum að gera betur. Ég sé stíganda í hópnum og mér finnst það sem við erum að reyna að gera vera að virka.“
