Íslenska karlalandsliðið tapaði gegn Norður-Írum í vináttulandsleik ytra í kvöld. Hér að neðan eru einkunnir leikmanna Íslands.
Fyrri hálfeikur Íslands var mjög dapur og skoraði Isaac Price eina mark hans á 36. mínútu. Íslenska liðið byrjaði seinni hálfleikinn einnig illa en eftir tæpan klukkutíma leik fékk Brodie Spencer í liði Norður-Íra beint rautt spjald fyrir brot á Hákoni Arnari Haraldssyni, sem var af dómara leiksins talinn vera kominn í upplagt marktækifæri.
Við þetta vöknuðu Strákarnir okkar aðeins en það varði ekki nógu lengi og tókst þeim ekki að nýta sér það. Lokatölur því 1-0 fyrir heimamenn. Þetta var síðasti leikur Íslands áður en alvaran tekur við í undankeppni HM í haust.
Hákon Rafn Valdimarsson – 6
Ekki mikið við Hákon að sakast í kvöld.
Guðlaugur Victor Pálsson – 6
Gerði sitt, vann skallaeinvígi sín og tæklingar.
Sverrir Ingi Ingason – 6
Átti fína vakt í hjarta varnarinnar og gerði sig einnig gildandi í föstum leikatriðum hinum megin á vellinum.
Daníel Leó Grétarsson (62′) – 5
Heldur „shaky“ á köflum og gerði ekki nóg til að halda sæti sínu í hjarta varnarinnar þegar alvaran tekur við í haust.
Logi Tómasson – 4
Var í tómu brasi í kvöld. Sendingar hans virtust ekki geta ratað á réttan mann, fyrirgjafir hans voru kraftlausar og svo mætti áfram telja.
Willum Þór Willumsson (62′) – 5
Komst ekki í takt við leikinn í kvöld.
Arnór Ingvi Traustason (46′) – 4
Átti erfitt uppdráttar og gerði afdrifarík mistök í aðdraganda marks Norður-Íra.
Hákon Arnar Haraldsson – 5
Mjög týndur í fyrri hálfleik. Vann aukaspyrnuna sem uppskar rauða spjald heimamanna og tók aðeins við sér eftir það.
Albert Guðmundsson (73′) – 6
Var með skárri mönnum í lélegu liði Íslands í fyrri hálfleik en dró af honum þegar leið á leikinn.
Jón Dagur Þorsteinsson (62′) – 5
Fann sig ekki hægra megin á vellinum, kom sér ekki í þær stöður sem hann kemur sér svo gjarnan í þegar hann spilar hinum megin.
Andri Lucas Guðjohnsen – 7
Fylgdi flottri frammistöðu gegn Skotum eftir með góðum leik í kvöld. Sýndi mikinn dugnað að vanda, pressaði um allan völl og var líklegur. Var hársbreidd frá því að skora, en bjargað var á marklínu frá honum í seinni hálfleik.
Varamenn
Ísak Bergmann Jóhannesson (46′) – 6
Þórir Jóhann Helgason (62′) – 5
Kristian Hlynsson (62′) – 5
Mikael Anderson (62′) – 6
Sævar Atli Magnússon (73′) – 5
Aðrir spiluðu of lítið til að fá einkunn
