Arnar Gunnlaugsson, þjálfari íslenska karlalandsliðsins, var að vonum svekktur með 1-0 tap gegn Norður-Írum í vináttulandsleik í kvöld.
„Mér fannst of mikið af tæknifeilum hjá okkur. Við vorum með léleg touch og leikurinn of hægur fyrir menn smekk. Við getum ekki bara haldið boltanum til að elta einhverja tölfræði. Við verðum að vera áræðnir,“ sagði Arnar við Stöð 2 Sport eftir leik.
Ísland var betri aðilinn framan af en mark Norður-Íra undir lok fyrri hálfleiks, eftir mistök Arnórs Ingva Traustasonar, gaf þeim mikið.
„Mér leið eftir 25 mínútur eins og við myndum vinna þennan leik svona 0-2. Mér fannst þeir vera pirraðir og vera farnir að hlaupa í hringi. En svo fá þeir þessa innspýtingu,“ sagði Arnar.
Ísland vann Skota 1-3 fyrir helgi og nú tekur við undankeppni HM í haust. Arnar getur heilt yfir verið nokkuð sáttur við þennan glugga.
„Strúkturinn var góður, pressan í báðum leikjum var frábær, við höfum náð að stjórna leikjum ágætlega með boltann en það sem stingur í stúf er hvað við fáum rosalega fá færi. Það er eitthvað sem við þurfum að leggja áherslu á.“
